🌸 قصتي

رحلة من التنمر لحب الذات — بالجد مش بالمجاملة

✦ من وأنا صغيرة

من وأنا صغيرة، دايما كان في تعليقات على شعري — بالأخص من الستات الكبار. "شعرك خريسة"، "نيجروا"، وكلام من هاد النوع. وكان يزعجني الموضوع كتير، بس ما كان عندي رد.

كبرت وأنا حاملة هاد الثقل، وكنت أتمنى لو شعري مختلف.

✦ اللي غيّر كل شي

في الجامعة التقيت بكتير ناس شعرهم كيرلي، وبجنن، وفخورين فيه. شوي شوي بلشت أحب شعري. وكان عندي صديقة مبلشة في روتين الشعر الكيرلي، وبلشت تعطيني نصائح ايش أعمل وكيف أبلش.

وأول مرة اشتريت منتج شعر كيرلي وأنا بالجامعة — اجى شب أفريقي على بسكليت يسلمني المنتج على محطة الباص 😂 حسيت وكأني بشتري ممنوعات. بس هاد اللحظة كانت بداية كل شي.

✦ الرحلة

شوي شوي، انتقلت من مرحلة شعر خربان من السشوار والمنتجات الغلط، لشعر صحي وبجنن — وطبعا مش بيوم وليلة.

الموضوع سهل؟ طبعا لأ. بس إزا معنيين، راح تستمتعوا في الرحلة — وهاد اللي بيفرق.

✦ ليش احنا؟

حبيت أعمل مجتمع خاص فينا للشعر الكيرلي — يكون متوفر فيه كل اشي ممكن نحتاجه، وكل الناس اللي بيمشوا نفس الرحلة يكونوا مع بعض.

وطبعا حبيت يكون في صناعات فلسطينية لدعم ستات بشتغلوا في بيوتهم بكل شغف 🍉

وهلأ دوركم تبلشوا في رحلة حب الذات ✨

لأنكم تستاهلوا كل لحظة حلوة ❤️